本文重點
立法會議員大多另有正職，喺議會工作時，少不免同自己本業有利益轇轕，尋日立法會辯論財政預算案嘅議員修訂案時，有議員提出懷疑投資移民計劃有份催谷樓價飆升，應予取消，不過，同為法律界人士嘅旅遊界議員謝偉俊（Paul）同埋自由黨主席兼交通運輸界議員劉健儀（Miriam）就喺辯論時申報利益，透露自己有從事投資移民相關嘅業務，即係有份憑呢個計劃發財。
按照申報規則，佢哋無需要進一步披露做咗幾多生意，不過，佢哋申報之後，引發唔少議員警惕，仲跟風申報埋一份，似乎呢個喺本港投資六百五十萬元嘅移民計劃，都為專業界帶來唔少好處。會計界嘅陳茂波話，佢太太服務嘅公司有做投資移民相關業務，所以佢都主動申報埋，講完之後，佢仲拍拍心口、細細聲話「差啲唔記得咗」。
葉劉申報惹哄堂大笑
跟住做過保安局局長嘅議員葉劉淑儀跟進申報話，做官嗰陣有份推動投資移民計劃！呢個申報好特別，所以佢啱啱講完，成個議事堂已經傳來哄堂大笑之聲。不過，申報時好謹慎嘅葉劉，喺投票時就烏龍㩒錯掣，搞到要舉手向主席申請修改，點知主席都跟住佢烏龍，誤將直選進身議會嘅葉劉淑儀當咗係功能組別議員，要其他議員提醒糾正。