仲有唔夠一個月，就係立法會補選投票日，5.16臨近，親中第一大黨建仔最近度咗條橋，打算全黨中委拉大隊過澳門，一於睇大三巴好過睇人做補選騷。佢哋杯葛「公投」，仲用腳抗議離開香港，呢條橋都算高噃，其他建制派都可以學吓！
據講，○六年建仔中委約二十人，都曾過大海拜訪澳門政府、立法會，參觀漁人碼頭同金沙賭場，當年仲係立法會議員嘅蔡素玉仲同記者爆料，澳門有人請佢哋食「五星級豪華晚餐」，有十六頭吉品鮑、官燕、海參同新鮮至極嘅龍蝦，節目咁豐富，四年後再訪濠江，絕不出奇，但揀正「516」就應該唔止巧合咁簡單。
建仔一名高層強調，「516」訪澳團仍在籌辦之中，澳門方面尚未覆實，仍存變數，所以不便透露詳情，至於點解揀「516」離港，係咪同「五區公投」有關，該名高層嘅解釋係：「516」大家最齊人。至於其他建制派政黨，暫時未見咁政治正確，工聯會、五散人、經濟動力同自由黨，都話無計劃喺「516」離港，或者搞大型集體活動，就連每年七一都搞港島巡遊嘅工聯會，都話無打算喺「516」搵節目。