每年預算案辯論，議員都有各種修訂，白鴿黨嘅涂謹申由回歸以嚟，喺議會提咗十次相同嘅動議，要求取消警方線人費，雖然年年都被否決，但佢仍然年年重提，今年第十一次提出修訂，但係尋日立法會開會時，佢就不敵病魔，忽然發高燒，結果第十一年嘅修訂要由黨友何俊仁代勞。
據講，阿涂患咗重感冒，尋日發燒、體溫高達攝氏三十九度，逼住要留喺屋企休息。白鴿黨即刻開會研究佢嘅修訂搵邊個跟，最終決定由身兼保安事務副發言人嘅鐵頭仁頂上。驟然客串阿涂嘅鐵頭仁，一上手都有啲唔習慣，雖然照稿讀，都畀人生硬嘅感覺，隔咗一陣先進入角色。講講吓，更一度叉住腰、望住署理保安局局長黎棟國鬧，好似阿涂上身咁。