22/04/2010

播放本新聞相關短片

政情:鬍鬚曾阿茂整餅

本文重點
立法會尋日二讀推出近兩個月嘅預算案,議員上周一連兩日辯論後,尋日輪到財政司司長曾俊華回覆,鬍鬚曾明顯有備而來,向議員、記者大派講稿,不過呢本講稿厚達十七頁、有六十八個段落,編印嘅格式好似一本「迷你預算案」咁,鬍鬚曾反環保而行,無非想美化佢尋日出台嘅整治樓市「曾九招」,不過,浪費咁多紙張,份回覆卻搞到錯頁、漏料,大擺烏龍,可謂阿茂整餅—冇嗰樣整嗰樣!

鬍鬚曾尋日出席立法會二讀辯論預算案時,忽然宣布「曾九招」,為咗隆重其事,佢專登印咗幾十份辯論稿畀議員同傳媒,呢份發言足足有成六十八個段落、十七頁紙,編排、格式好似預算案咁,同一般政府喺立法會派發嘅官員辯論稿好唔同。而鬍鬚曾抓住份稿一讀就講到差唔多一個鐘,從失業率、歐美金融海嘯到特別信貸保證,甚至粵港合作、港台合作都慢慢講,以口水嚟講,真係夠晒誠意。

講稿猛炒舊料

不過,佢精心製作嘅發言稿就烏龍多多喇,先係被人發現忙中有錯,第五頁同第三頁內容重複,搞到第十七至二十一段嘅內容漏咗,呢部分正係尋日政府對樓市出招嘅核心,即係今年首季,港人供樓款項已經佔私人住宅住戶入息中位數嘅四成二,亦係佢講到明擔心嗰啲。

跟住又被人發現,份講稿唔少內容都係炒舊料,事關預算案公布之後,鬍鬚曾先先後後出席好多午餐會,並喺呢啲場合發言,而尋日份稿就係將佢過去嗰啲發言稿炒埋一碟,另加九招大雜燴。或者,鬍鬚曾好想為尋日出台嘅「曾九招」整靚啲包裝,可惜眼高手低,只顧包裝不顧實際,結果又係得啖笑!