小白觀點：喬布斯明跣山寨廠

傳說中嘅iPhone第四代終於登場，但今次唔係由黑衫黑褲嘅喬布斯出嚟介紹，而係由一個叫Gizmodo IT網站爆出嚟，據講係有個烏龍蘋果電腦工程師喺公司附近蒲吧，玩得興起跌咗，後尾畀人執到寶，用五千蚊美金賣咗畀呢個網站，嘩，咁筍，我都想執呀！

小白老弟聽到呢單嘢，覺得真係得啖笑，事關當中疑團多多，蘋果電腦出晒名保密工夫到家，冇乜可能咁失策。我懷疑呢個係局都唔定，為乜？有人一口咬定係為新iPhone造勢，但我就覺得蘋果電腦唔使咁做，只要Show個Logo，屎都有人排隊買。所以我懷疑今次極有可能係自導自演放流料，等大陸山寨廠收錯風，拿拿臨搶先生產一億幾千部A貨，結果全球開售嗰日，新iPhone係三尖八角，老翻搶唔到頭啖湯，當堂坐晒艇，呢個喬布斯果然係老奸巨猾。

e-mail：sunsiupak@gmail.com

Blog：http://sunsiupak.blogspot.com

阿豪觀點：拋窒對手等佢收皮

蘋果電腦職員喺酒吧消遣，唔小心賴低咗一個懷疑係iPhone第四代原型嘅手機，結果落入電腦雜誌手上，仲玩埋大解構。蘋果方面大為緊張，發信向雜誌要求取回部手機，真係唔到你唔信。

今次事件證明蘋果確係好嘢，你今日拿喺手玩緊嘅iPhone，其實已經out得好緊要，因為蘋果好可能已經秘密研發緊新技術，話唔定包括利用iPhone嚟發射核彈都唔定！

所以話，今次大家唔好以為執到寶，可以一窺iPhone嘅最新功能，所謂「第×代」真身，話唔定可能係蘋果放出嚟嘅煙幕。大家都記得美國玩咗一手星球大戰計劃，勁拋蘇聯佬浪頭，結果就收咗佢哋皮。今次蘋果會唔會掉番轉頭，等對手以為佢哋只係有咁多貨賣，因而掉以輕心呢？結果，一樣可能係食塵……

e-mail：lukchiho75@hotmail.com

Blog：http://lukchiho.blogspot.com

網友觀點……

小　弟：蘋果電腦整色整水嚟介紹新產品，相當有新意。

用　家：個網站將啲新功能寫到鬼咁吸引，十足廣告推介！

鮑威爾：部嘢曝咗光，老翻唔使好耐就有得賣喇。

噏　風：多啲落呢間酒吧有着數，隨時執埋第五代都唔奇。

有料爆：

中樂團被審計署踢爆大花筒，下次又輪到邊個？

SMS傾埋一份：6016 2496