話時話，街頭表演呢家嘢，都幾啱香港人口味o架，香港不嬲有大批街頭藝術家，每逢節假日，都喺公園或行人專用區打band、玩雜技、做話劇，通常都會有成百人圍觀。可惜喺大家睇得津津有味嘅時候，就有差人走過嚟，要表演者收檔，大家惟有一拍兩散。

因乜事差人對街頭表演者咁惡死嘅呢？事關香港仲未有街頭表演發牌制度，街頭表演者咪同無牌小販咁，下下會被冚檔囉。唔好彩仲會被檢控添，早排屯門有班人喺公園夾band ，就被告上法庭。

叮！香港假假地都係國際旅遊中心，點講都冇理由將街頭表演趕盡殺絕嘅。新一份財政預算案話要推動本港文化藝術發展，民政事務局準備喺今年下半年推出街頭表演試驗計劃，仲話要將藝術融入社區。

今鋪好嘞，街頭表演者終於唔使走鬼嘞。不過咪咁開心住！事關呢個計劃問題多多，話就話推動街頭表演藝術，但實際上係設置好多限制，扼殺街頭表演至真。叮！

按照計劃規定，申請街頭表演直情好似過五關斬六將，先要將節目向政府專責小組試演，通過之後，仲要喺表演前兩個月向場地管理者登記，仲要承諾遵守場地使用守則。大佬，街頭表演咋，使唔使搞到預先審查咁大陣仗呀？

仲有噃，就算申請成功，節目審查又過關，仲係限制多多，比如每節表演唔准超過兩粒鐘，更離譜嘅係，表演者唔可以索取打賞。正如有街頭藝術家話齋，表演者係賣藝o架，唔准收打賞，點搵食呀？

講真，行勻全世界都未聽過唔准街頭賣藝收打賞嘅。例如喺台灣，台北市政府規定，街頭藝人唔單止可以收打賞，仲可以自訂收費方式。就算喺大陸，街頭賣藝收番少少錢，政府都唔會理啦。再講，如果演得唔好，都冇人打賞啦，一個願畀，一個願收，政府又何必多管閒事噃。民政局班高官真係阿茂整餅，冇嗰樣整嗰樣。

其實，政府搞個怪雞計劃出嚟，都唔奇嘅，班高官從來都唔係真心發展街頭表演，只係見人哋有，先至跟風啫。最弊嘅係，政府又唔諮詢，根本唔知表演者需要乜嘢，觀眾需要乜嘢，咁樣閉門造車，有乜法子唔搞出個大頭佛吖。社區人士都講到明，民政局急就章，計劃不切實際，只會失敗收場，睇嚟都係好嘅唔靈醜嘅靈咯。