「中間分界頭」係行政會議成員「金刀梁」梁智鴻嘅標記，形象深入民心，而佢戴住嘅黑粗框眼鏡，更係二十年不變，亦變咗招牌眼鏡。原來佢只揀幾十蚊貨色，仲一次過狂掃十幾副添。點解佢偏愛平框？理由只得一個，就係眼鏡框唔重要，鏡片先最重要喎！
早前一個慈善活動以扮金刀梁為主題，佢本人慷慨借出「珍藏」，放喺VIP房任嘉賓借用，點知用家戴後覺得超正，並據為己有，搞到金刀梁冇晒「後備框」。佢話，呢款框幾乎已絕版，要去指定嗰間舊式眼鏡舖補貨至得。
雖然唔少人覺得呢款方形黑色眼鏡框老土咗啲，金刀梁就鍾意佢襯晒自己面形，恍如度身訂造，加上個框架超輕，優點咁多，絕對係物超所值，證明平嘢未必冇好喎！
