立法會前醫學界議員「齋勞」勞永樂醫生經常喺公共衞生政策上同政府打對台，最近更踩入教育界，親自撰寫通識教科書，實行「醫而優則教」。齋勞呢本教科書花咗半年做資料搜集，屬於新高中課程通識科六大單元入面嘅「公共衞生」範疇，內容好全面，由禽流感、沙士同豬流感等疫情，以至醫療融資、幹細胞同安樂死都有涉及，仲輔以大量資料，唔講真係睇唔出係處子作。
齋勞話出版社初時請佢做顧問，佢索性親自操刀自己寫埋。佢話通識科係新科目，即使老師都未必掌握到點教，市面上嘅教科書多數流於片面，好似個個都話中西醫要結合，但佢請教過著名中醫關之義，關醫師話中西醫除咗都係全心救人外，基本上冇嘢似，勉強結合未必有幸福喎。齋勞仲會推出「售後服務」，歡迎學校搵佢同通識科老師交流吓，亦會喺facebook開個專頁解答師生疑問。