青海玉樹縣發生七點一級地震，牽動港人善心，廠商會嘅立法會代表林大輝上禮拜即刻打長途電話上青海，事關佢喺當地興建咗五間小學，擔心師生安全，好彩打探之後，知道小學所在地距離震央最近嘅都有七百幾公里，五間小學絲毫無損，可算不幸中之大幸。
身兼河南省政協常委嘅大輝，喺河南有十八間「飛揚小學」，近兩年開始發展至青海，五間小學用番呢個名，寓意透過知識脫貧，一飛沖天。佢話青海風景如畫，可惜土地貧瘠，夏天極度乾燥，冬天則苦寒難耐，港人一般好難適應。
佢憶述兩年前首次同女助理去青海，女助理患上高山症，當地人搵嚟一個氧氣罩畀佢吸，但佢同女助理一攞上手，發現氧氣罩嘅罩邊「綑晒邊」，未使吸氧，見到嗰一撻撻陳年污迹，成個人已經醒晒，深怕吸咗入肺冇事都變有事，於是女助理最後寧願返酒店大覺瞓，都唔敢嘗試吸氧治療。大輝話，一直知青海貧窮，但嗰次真係大開眼界。