本文重點
五月十六號立法會補選畀泛民主派騎劫搞變相「五區公投」，班問責高官同啲政界名人投票與否備受矚目，最敏感梗係建制派中人啦，被問到會否投票時，都唔知表唔表態好，其中有位商界重量級人士對投票問題尤其敏感，邊個？咪就係港鐵行政總裁周松崗囉。點解咁敏感呢？之唔係因為○七年區議會選舉山頂選區提名風波囉。
當日可能唔喺香港
當年周總冇顧及山頂區一向係富貴黨嘅地頭，提名公文袋陳淑莊參選，激親富貴黨主席田北俊，周總事後要致電向田少沙冧，但田少亦因為被指向周總施壓，要向周總同公眾道歉。
周總尋日喺中環食晏晝，梗係捉住問吓佢「5.16」會唔會去投票啦，大家估吓佢點答？佢竟然話仲未決定，仲話可能唔喺香港喎！
周總貴人事忙，未決定投票都唔出奇，但係咪仲一條心投票支持公文袋港島區候選人陳淑莊呢？佢一聽見「陳淑莊」呢三個字即時笑騎騎，然後急急上座駕離開。莫非見過鬼怕黑？
港島區候選人仲有李振雄、梁永浩、戴卓賢同黃興。