香港參加上海世博，大拿拿用咗逾三億四千萬港元籌辦整項活動，其中一億四千五百萬元用嚟設計同興建香港館，其餘兩億元就用嚟營運同舉辦「城市最佳實踐區」展覽，發到咁大嚟搞，用意都係推銷香港，可惜唐唐出師不利，瘀爆國際不特止，港人顏面卻畀佢丟清。

唐唐喺巡視後硬住頭皮接受傳媒質詢，被問到喺展館大出洋相，佢強顏歡笑咁話：「一定要改善啦！因為我哋預咗將會有好多人嚟參觀嘅，除咗繁體、簡體外，仲有好多其他語言，所以要保障人流暢通，一切運作都要正常，要做到最好囉！」唐唐飭令在場官員要喺五日試運期內盡力改善，仲話已發出邀請，希望領導人嚟香港館參觀添！

Rita要孭鑊

呢次唐唐踩蕉皮，邊個要孭起隻鑊呢？睇番資料，整項活動都係由政制及內地事務局全權負責，自然要算到局長「林公公」林瑞麟頭上啦。尋日打去問政制及內地事務局點解會咁失策甩轆，局方話搵相關部門同事回覆，冇耐就收到商務及經濟發展局來電，原來實踐區係佢哋負責，即係話局長Rita劉吳惠蘭要為今次甩轆事件孭鑊。Rita搞經濟發展，搞個展區都甩轆，唔怪得咁多人話上海會從後趕上超前香港啦！