話說雪佛龍香港有限公司計劃陸續終止加德士喺香港嘅家用石油氣服務，全港有十幾個屋邨或屋苑受影響，最快半年後陸續「斷氣」，當中唔少屋邨或屋苑就喺新界東。建仔嘅當區立法會直選議員陳克勤，自然要搶先向政府提出書面質詢跟進事件啦，點知竟然鬧雙胞。

邊個做程咬金？原來係明明做開勞工事務嘅葉偉明撈過界，同樣以書面質詢嘅形式，要求政府詳細交代居民「冇氣用」嘅應對方案，又質問政府有冇就本港能源供應嘅情況進行研究、監管等問題。

勤力搭夠大打民生牌

其實工聯會要推葉偉明走上直選之路已經係顯而易見嘅事，依家就因為石油氣更令佢露晒底，就連兄弟黨嘅建仔一樣冇面畀，擺明要同克勤仔爭功、爭出位，以求收買新界東街坊嘅人心。建制派竟然自己人打自己人，仲要兄弟相爭，之後唔知點收科呢？

審視今屆立法會工聯會四子中，論聲勢、搶鏡度，葉偉明始終唔及兩位直選議員KK黃國健同「阿王」王國興，話晒KK係工聯會前會長，阿王就延續佢「建制派長毛」嘅鮮明形象，最近喺反對補選撥款上更不時語出驚人，相比之下，葉偉明確被比下去。

好在葉偉明勤力搭夠，加入最多關於基層問題嘅立法會福利事務委員會，大打民生牌，而且工聯會刻意將處理勞資糾紛嘅工作交畀佢擔大旗，令佢keep住曝光，只要佢呢兩年好好開展地區工作，怕且要落腳新界東都唔係冇可能嘅事，同佢一樣唔多顯眼嘅克勤仔睇怕都要當心啲先得嘞。