小白觀點:睇手指可知龍與鳳

嘿！港式咖啡王大賽，竟然畀一個嚟自深圳嘅參賽者贏咗，亞軍都唔係啲乜嘢著名茶餐廳大師傅，亦唔係米芝蓮星級餐廳嘅法國佬，而係便利店阿姐，真係成地都係眼鏡呀！

唔知大家有冇發覺，近排開咗好多懷舊茶餐廳，小白老弟慕名光顧過幾間，冇錯，裏面嘅枱枱櫈櫈杯杯碟碟都係用番啲舊款，裝飾亦好落本好用心思，之但係唔知點解，硬係覺得呢啲老翻有形無實，冇厘味道。港式茶餐廳文化嘅精要係乜？咪就係要夠污糟囉，枱面玻璃底有揮之不去嘅水漬、卡位底堆滿罐頭即食麵加餐紙濃痰，咁至夠Feel嘛。

所以呢，我對呢啲咖啡王奶茶王嘅賽果好懷疑，如果畀我做評判，其實根本連飲都唔使飲，只要睇吓參賽者隻手就知，如果十隻手指中得兩隻手指公冇綑黑邊，嗰個一定係隱世大師傅！

Blog:http://sunsiupak.blogspot.com

阿豪觀點:政府應幫港技申遺

港式咖啡王大賽，結果由嚟自深圳嘅參賽者勝出，第二、三名就由便利店嘅阿姐奪得。豪伯覺得咁樣係好事，第一，證明香港茶餐廳文化已經衝出香港，影響埋內地；第二，絲襪咖啡呢樣絕活，已經深入民心，成為家傳戶曉嘅「港技」。特區政府收到未呀？快啲幫港式茶餐廳申請為非物質文化遺產啦！

睇吓得獎者嘅心聲，個個都不約而同咁話，啲咖啡沖得好飲，令到唔少顧客返轉頭再幫襯。所以話啫，內地應該搞多啲類似比賽，等業界知道，要吸引回頭客，唔一定要靠火鍋湯底落罌粟，搞到啲顧客上癮咁低莊嘅，乜嘢都係假，講到底最重要都係搞好產品嘅質素。當然啦，內地「黑哨」問題嚴重，比賽公信力存疑，都係嚟香港搞好啲！

Blog:http://lukchiho.blogspot.com

網友觀點

賓仔：大賽日撞啱跑馬，茶餐廳師傅可能分咗心咪衰晒囉。

小黃：便利店可乘機搵嗰兩位阿姐做生招牌，大搞便利店咖啡吖。

飲家：茶餐廳講求快，啲師傅做壞手勢咪做唔到咖啡王囉。

阿甘：非專業嘅阿姐沖絲襪咖啡可能冇咗商業味道，所以分外好飲。