其實，家陣殘疾人士面對嘅障礙又點止一級樓梯呀。「無障礙之都」嗌咗咁多年，但政府齋噏唔做嘢，殘疾人士依然係路路不通。

呢嗱，食環署用咗四百幾萬翻新上環樂古道同磅巷兩個殘疾人士公廁，結果得物無所用，白白嘥晒啲公帑。何解？原來樂古道間公廁無論由邊條街入，都要行十幾廿級樓梯至到，輪椅使用者望住個廁所標誌，再睇吓條長樓梯，仲唔當場暈低？附近磅巷嗰間又如何？原來一樣唔掂，路面有石壆，使用輪椅極之不便，人有三急遇着咁嘅障礙，唔谷爆至奇啦！

食環署解釋話，樂古道公廁唔適合輪椅使用者，至於外面嘅樓梯，對唔住，因為唔係署方管轄範圍，唔關佢哋事。即管聽吓運輸署又點解釋，原來食環署設計公廁嗰陣並冇徵詢過佢哋意見，同樣事不關己，總之就冇得改。

叮！食環署同運輸署即係扯貓尾啫。使幾百萬公帑翻新公廁，兩個政府部門之間完全冇協調溝通，各自為政，受害嘅係殘疾人士，咁卸責法，仲有冇離譜啲呀？

香港復康協會負責人篤爆，以往中環、山頂等地區嘅公廁亦出現過類似情況，要不斷投訴至得到改善。另外，唔少公園嘅殘疾人士廁所壞咗好耐都冇人理，甚至有外判公司貪管理方便，將呢啲廁所上鎖，當局一樣闊佬懶理。

「無障礙之都」嘅怪事唔止呢啲㗎。呢，沙田市中心巴士總站話就話設有供失明人士使用嘅引路徑，不過唔止形同虛設，甚至係靠害。引路徑上戙個巴士站牌，旁邊堆放單車雜物不特止，巴士公司仲橫跨上面加條鐵欄，路政署幾個月都懶得理。

叮！講真，所謂無障礙設施，好多都係得個睇字。好似本港主要藝術表演場地之一嘅高山劇場咁，落成廿七年以來一直唔設傷殘人士專用斜道，畀人炳得多，當局至設咗一條斜道咁大把，但就被踢爆斜度超標三倍，輪椅使用者隨時會失控。待客變趕客，無障礙變咗擺明靠害，真係好做唔做。

唉，政府做嘢從來都係得把口，講多過做，《殘疾歧視條例》實施十幾年，當局居然仲允許咁離譜嘅現象存在，保障殘疾人士權益係真心定係假意，唔使問都知答案啦。計太一叮話齋，殘疾人士面對嘅最大障礙，根本就係呢個特衰政府。叮！