政府對申辦亞運會嘅立場突然變得好飄忽，有消息話經費數以百億元計，無論點計，條數都蝕硬，所以政府可能褪軚唔申辦亞運。眾所周知，港協暨奧委會會長霍震霆對申辦亞運好緊張，佢尋日為保良局嘅慈善保齡球賽擔任主禮嘉賓，咁當然捉住佢問個究竟啦！
霍公子話個人希望香港可申辦二○一九年亞運會，但仍要等政府內部評估，到六月底先知當局會唔會提交申辦意向書。佢仲話如果要推遲到申請二○二三年嘅亞運會，對運動員嚟講實在太長遠，佢認為本港面臨鄰近地區競爭，政府應該考慮到本港體育事業發展，喺體育設施方面做長遠投資，臨尾都講多句話相信政府有能力申辦亞運。老實講，隔四年先有一屆亞運會，試問香港運動員嘅生涯有幾多個四年吖！霍公子都係想話畀政府聽咪錯失黃金機會，順便插多次政府喺體育設施投資唔夠啫！
雖然霍公子謙稱自己好耐冇掂過保齡球，點知佢一開波就全中，簡直技驚四座。唔知係咪反射作用，顯示佢對二○一九年香港舉辦亞運嘅決心，要志在必得呢？