香港四大商會嘅龍頭香港總商會將喺五月改選領導層，一場龍爭虎鬥正暗中醞釀，令政壇再起風雲。據悉，總商會現任常務副主席、醫管局主席胡定旭，按傳統成為接替包立賢任主席嘅大熱人選，但會內傳言四起，指有人想「倒胡」。
據聞有人質疑肥胡嘅接班能力，最有力指控就係批評肥胡唔係商界老闆，代表性成疑。係唔係真係有人「倒胡」？外界至今難以確認，據悉，肥胡評估過，關於自己唔係老闆身份嘅質疑，對佢未構成殺傷力。
肥胡事先準備好嘅理據係，首先佢依家係日本最大銀行三菱銀行嘅大中華區首席顧問，又係中國農業銀行董事、安永會計師事務所高級顧問，同商界嘅聯繫極多極深；第二，前滙豐「大班」艾爾敦當年做總商會主席時，亦已離開滙豐，去一間大型會計師行做高級顧問，有先例可循，肥胡呢個常務副主席要接任主席，應該難度唔大。究竟結果會係點？好快就揭盅。