作風低調屬「行動派」嘅懲教署署長郭亮明，前晚喺一個職員晚會上突然宣布會喺今年九月退休，提早同班手足say goodbye，仲祝福大家添！據知今年九月係佢五十七歲生日，屆退休年齡，所以要退位讓賢，相信會由副署長單日堅接任。
其實早前盛傳佢會喺今年內退休，所以之前有記者已問定佢退休大計，當時佢話諗緊環遊世界，甚至重拾書本。其實佢將三十七年青春畀晒懲教署，都係時候享受吓。郭Sir後生時係懲教署內出名嘅美男子，仲好勇猛添，好似佢膊頭嘅紅銀雞繩，係平息越南船民中心騷亂防暴有功而得嚟。
據知接手做署長嘅單Sir都有條紅銀雞繩，前年香港搞奧馬，佢借調幫手，據講佢籌備應變計劃表現出色而獲嘉獎。有消息話單Sir來頭都好猛，做過赤柱監獄十二年保安主任，專諗計同啲重犯鬥智鬥力，有懲教飛虎之稱嘅緊急支援隊都係由佢成立。