喺佛教界德高望重嘅夢參老和尚（夢老）近日訪港，尋日喺志蓮淨苑舉行一場佛學講座，吸引數百善信，潛心向佛嘅潮屬社團總會名譽會長高佩璇同「牛仔褲大王」楊釗都嚟「朝聖」。夢老遠道由五台山來港，高佩璇出錢又出力接待；楊釗就視夢老嘅開示如甘露，抄足筆記粒幾鐘仍未停手。
九十六歲嘅夢老自九二年起，每年例必來港弘法，每次都座無虛席。楊釗同夢老私交甚篤，尋日趁講座後拜訪老人家傾佛偈，講笑咁話：「你（夢老）睇嚟似七十歲噃！」氹到老和尚笑逐顏開。
高佩璇都係夢老粉絲，兩人相識七年，無所不談。夢老推崇佛教中嘅「利他精神」，果然講得出做得到。話說高佩璇日前見夢老身上掛住一串散發香氣嘅珍貴佛珠，隨口講句：「夢老，你個身好香！」話口未完，夢老靜雞雞將佛珠轉贈高佩璇嘅女兒，弟子睇見不禁目瞪口呆，驚嘆大和尚如此捨得！