呢排「80後」熱爆社會，尋日有團體搞咗個研討會剖析「80後」現象。老實說話唔係人人鍾意聽，好似白鴿黨副主席「單雞」單仲偕喺會上話，日本首相鳩山由紀夫、美國總統奧巴馬同台灣嘅總統馬英九都以高民望當選，可惜一年過後，三人嘅民望都跌至三成，質疑即使有普選都未必能夠解決所有問題。
聽完單雞咁講，場內人士即刻O晒嘴，單雞旋即被圍攻。有「庸官殺手」之稱嘅前問責高官王永平話，爭取普選係為咗提高政府嘅問責性，狠批單雞連最基本嘅民主元素都搞唔清；社民連主席陶君行亦感到匪夷所思：「佢身為民主派最大黨嘅副主席，講埋啲咁嘅嘢，唔怪得港人覺得冇政黨代表到佢哋啦！」