19/04/2010

播放本新聞相關短片

政情:黃永光攞完金牌拉頭馬

港鐵尋日搞競步賽,主席邀請賽只係跑一公里,到咗衝線嘅緊要時刻,眼科醫生周伯展率先跑出,西醫工會會長楊超發醫生跑第二,亞洲金融總裁Bernard陳智思跑第三,信和太子爺Daryl黃永光只跑第四。

競步唔單止講究速度,更加講究姿勢正確,所以經大會評判扣埋姿勢分後,名次大執位,完全冇出錯嘅Daryl連跳三級奪冠,周醫生跌至亞軍,Bernard就維持第三名。

Daryl開心到飛起,話差唔多年年都嚟支持港鐵呢個活動。今次佢為個活動籌得十二萬五千元,先攞咗籌款最多公司嘅金牌,跟住又憑個人實力攞埋競步金牌,真係出錢出力不落人後。

轉頭Daryl又喺快活谷出現撐愛駒「永利多」場,結果「永利多」好生性,幫Daryl贏咗四十八萬頭馬獎金,Daryl開香檳慶祝拉頭馬,全日笑到嘴都合唔埋。呢日絕對係佢嘅吉日呀!