19/04/2010

播放本新聞相關短片

政情:鬍鬚曾拋洋書包o吾面紅

本文重點
財爺鬍鬚曾自公布佢嗰份完全冇料到嘅預算案後,劣評如潮,民望插水式go down,而立法會喺上個禮拜辯論鬍鬚曾預算案,班議員亦都鬧鑊甘,而喺今個禮拜三等包括佢在內嘅問責高官答辯後,就會付諸表決。未到佢講嘢,鬍鬚曾竟然唔守規矩,尋日喺佢嘅個人網誌度偷步回應。

佢喺網誌度向班議員大送高帽,讚佢哋嘅發言花唔少心思云云,跟住又話無論議員嘅立場係贊成或反對,無論議員嘅遣詞用字係冷靜抑或激昂,佢哋用心參與預算案嘅辯論,背後其實都懷抱住對香港嘅一份關心同感情。

咪畀佢呃到暈晒大浪呀,因為佢根本當班議員冇到,佢講到明每年嘅預算案都唔可能完全滿足所有議員嘅訴求,跟住引用《湯姆歷險記》作者、美國著名作家馬克吐溫(Mark Twain)嘅經典名言:「若我們都思想一致,則大為不妙,只有意見不同,賽馬才會出現。」話只要大家保持理性討論,將眼光跨越短期政治利益,咁政策辯論將會成為香港社會進步嘅動力。

仲有兩年等收工

嘿!竟然好似上身咁,當正自己係馬克吐溫,倒轉頭教訓班議員添!之不過,各黨派議員先前喺辯論鬍鬚曾嗰份劣評如潮嘅預算案時,扯晒火咁兜口兜面鬧佢遏樓市不力、樓市政策「等運到」、係孤寒財主乜都唔做,更有議員炮轟預算案對貧富懸殊交白卷,質疑佢有見剩番呢兩年任期所以「等收工」。當時坐喺議事廳嘅鬍鬚曾一碌木咁,一副罵不還口、打不還手咁款,當班議員透明。

唔好唔記得,馬克吐溫咁多經典名句中,仲有呢句:「人類是唯一會臉紅的動物,也是唯一該臉紅的動物。」鬍鬚曾竟然面皮厚到咁,畀議員鬧到爆都唔識面紅。仲有幾日立法會就要表決預算案,佢尋日先喺網誌話會作最後努力,爭取議員支持,咁Hea,話佢唔係等收工都冇人信啦!