19/04/2010

播放本新聞相關短片

任意網為:冰島再揚名

小白觀點:拖完爛帳又噴黑煙

以前提起冰島,好多人淨係識得有個Bjork,不過近年呢個北歐小國愈嚟愈出名。一個金融海嘯冚到冰島就嚟破產,最過癮嘅係,歐洲諸國債主上門收爛帳咩,佢一於好少理,玩公投耍無賴唔肯還之餘,仲爆個火山猛噴黑煙,將本來啱啱復甦緊嘅航空業當堂打殘,你又可以咬佢食咩。

至於講到對全球嘅禍害性,冰島有排都未及得上我哋嘅國人。呢嗱,最近連近乎係世外桃源嘅澳洲大堡礁,都畀一艘中國運煤船搞到一鑊泡,真係名副其實嘅黃禍。二十幾年前有班蛋頭學者大講「河殤」,危言聳聽話「中國再不改革,將被開除球籍」,之但係咁多年嚟,礦難人禍乜都齊,奇怪嘅係,中國何止冇被人開除球籍,依家落場打波,主隊係佢,客隊又係佢,仲做埋球證吹黑哨添,呢啲咪叫「多難興邦」囉,冰島人學嘢喇!

Blog:http://sunsiupak.blogspot.com

阿豪觀點:恐怖分子都冇咁堅

冰島火山爆發愈嚟愈勁,癱瘓歐洲至全球各地嘅航空交通,影響將長達半年之久。咪睇冰島國家細細,之前瀕臨破產已經大件事,家陣再嚟一劑「冰火」,就更加係累街坊。唔係咩,連恐怖分子發動恐襲,都冇可能令航空交通停超過三日啦!

成日話全球一體化,今次冰島出事,就真係一個最佳例子,上至總統下至平民都影響到。好似話出席波蘭前總統萊克.卡欽斯基葬禮嘅各國政要咁吖,好多都行程受阻唔能夠起行;挪威首相斯托爾滕貝格滯留紐約,更加要利用iPad遙控國政添!

亦有人因禍得福,由於新鮮器官唔可以擺得耐,依家又冇晒空運,於是惟有畀住喺附近、但情況冇咁緊急嘅病人嘞。其實點講都好啦,起碼今次冇話熔岩淹埋啲學校,唔使等待「生命嘅奇迹」,其實只要留番條命仔,已經係最大嘅幸福喇!

Blog:http://lukchiho.blogspot.com

網友觀點

周仔:香港有沙塵暴,歐洲有火山灰,到處都係環境污染。

駱駝祥:航空業想搞工業行動都難,航空運輸重創隨時執。

谷到爆:真係好勁,全個歐洲灰灰天,仲好似話會再爆添呀。

英超迷:冰島啲火山灰吹到英格蘭,隨時冇波睇添呀……