的士佬：督導先生幾多點？

交通督導：三點零一分。

的士佬：督導先生幾多點？

督導：三點零二分。

的士佬：督導先生幾多點？

督導：兩分半啦。

的士佬：我熄匙！

督導：玩嘢呀！

的士佬：三分鐘豁免熄匙吖嘛，唔好阻住，我再開！

督導：時間累積計算㗎，唔識例呀？

的士佬：咩呀，我話開車，開去隔籬街再泊呀！鬼叫你邱騰華整色整水阻人搵食呀，搵唔到食，梗要搵啲嘢消遣吓㗎。嗱，後面仲有一架等緊，你快啲埋位啦！

鑑於有客紅Van可獲豁免熄匙，香港又多了一種「全職乘客」的新興行業。

司機：唉，風水輪流轉，多得邱騰華個熄匙大計，以前我收乘客錢，家陣居然要掉番轉畀錢「乘客」喎，真係搵食艱難呀……

乘客：大家咁話啦，我失業都有幾年啦，政府一時又話創造職位，一時又話「就業導航」，統統幫唔到我。死得佢呀，原來停車熄匙至係創就業嘅好橋喎。嘻嘻，其實邱騰華咁有辦法，應該一早調去勞福局啦。不過話時話，阿華仔咁好人才，唔通諗唔到你哋嘅苦況？既然有豁免，點解唔係所有搵食車一概豁免呢？

司機：咩諗唔到呀，懶理就真啦。喂，唔講啦，有客上，落番車啦「乘客」……