香港所謂「六大優勢產業」，其中「醫療」一項，如果唔剔除，真係笑死人冇命賠。近排公立醫院嘅醫療失誤一單驚嚇過一單，繼「滾水淥B」後，瑪麗醫院又發生「搞錯器官落錯刀」事件：畢業僅四年的女醫生疑沒有資深醫生督導下，扮演了「差不多女醫生」，子宮與膀胱都係器官，差不多啫，於是替孕婦剖腹分娩期間割破膀胱，傷口長達五厘米，需急召泌尿科醫生修補。事主黃太留院十日期間一直插尿喉，痛不欲生，出院後開始有尿頻徵狀，需長期覆診。
公立醫院做手術，割錯器官時有所聞，如割錯乳房，冇癌的當有癌切除，有癌的卻保留；一係就做手術有嘢送：紗布、刀片之類，總之，當正病人係超級無敵儲物櫃！筆者個孫排期割包皮，睇怕要取消，我驚一落錯刀，到時「香港還有一個小太監」，咁就該煨兼大吉利是！縱使不是「落花流水春去也」，卻來個「回贈」：恭喜成為第一千個有嘢送嘉賓──割包皮送皮包！問你服未？各位，如果醫療咁都可以發展成「優勢產業」，經濟就不會有泡沫，只會愈來愈像泡沫！
有寓言說，馬車上裝着兩隻木桶，一隻盛滿美酒，一隻空空如也。一路上，盛滿美酒的桶沉默不語，空空如也的桶則不停地大喊大叫，又唱又跳。現實生活中，正是空空如也的木桶佔盡風光。
你看那周一鑊，出來講嘢愈來愈有哲人的味道，從來答完問題只會令人產生更多問題。醫療優質產業嘅嘜頭，Key周一鑊個頭上去，加三條綵帶，來個「飛鑊在天」如何？