話時話，高鐵工程的而且確需要監察，人哋廣東路段一早就開工，預計出年就通車，而香港路段一直紙上談兵，拖咗咁多年至落實，本來已經慢人哋幾拍，再唔監察，點知會唔會又脫腳㗎。其實，需要監察嘅唔單止工程進度，工程開支更加要(目及)實，否則，容乜易出現大花筒。

無他嘅，事關大家對呢個政府已經冇晒信心。佢哋吹水唔抹嘴，幾年前已煞有介事推出所謂十大基建，但吹到依家，只有一兩項開咗工，其他都仲係得個講字。咁搞法，唔單止工程成本搏命飆升，仲會拖慢香港整體發展步伐。好簡單，就以高鐵為例，估計動工期間可以創造一萬一千個職位，通車後可以提供一萬個職位，咁多人等開工，但工人急政府唔急，吹脹！

最慘仲係，重大基建工程一拖再拖，必定會造成骨牌效應，一項工程拖住，其他工程亦行不得也。嗱，高鐵拖延開工，沙中線就成為犧牲品，動工無期。呢條全長十七公里嘅過海鐵路，十年前已開始構思，期間一波三折，最後搞到要分兩階段興建。當局本來承諾今年動工，二○一五年通車，點知依家又話因為將大量人力及資源投放喺高鐵項目，影響其他工程進度，惟有將沙中線押後至明年至刊憲，開工更係遙遙無期。

有人計過數，咁多大型基建工程一拖再拖，整體造價預料已升咗四至七成。例如高鐵，三年前造價都唔使四百億，依家就要將近七百億。又如沙中線，○八年估計造價三百七十幾億，依家可能高達五、六百億。西港島線超支得仲犀利，原本預算係八十九億，依家升至一百五十幾億，升幅超過七成咁多，問你怕未。

初步推算，單係高鐵、西港島線等五項工程，已經超支咗四百三十幾億元，即係平均每位港人要多付出六千元。叮，呢啲咪叫做港府請客，市民埋單咯。

正所謂，沉舟側畔千帆過，病樹前頭萬木春。周邊城市基建搞得熱火朝天，一日千里，只有香港原地踏步，不進則退，真係眼冤。班高官唔知衰，仲喺度自欺欺人，一時十大基建，一時六大產業，再咁吹水落去，遲早高鐵變低鐵，香港變臭港。叮！