小白觀點：實畀班富貴刁民玩殘

當局建議用定額罰款規管停車熄匙，違例嘅司機，位位罰三百二十蚊。好明顯，環境局局長邱騰華冇心繫家國，竟然公然違背已故領導嘅遺訓。係乜？咪就係「最大的危險就是脫離實際」囉。

你知啦，香港夏天閒閒哋三十幾度，如果的士真係停車熄匙嘅話，車廂隨時熱十度八度，一個會行走嘅微波爐，搵鬼搭咩！有見及此，今次政府懶叻咁，度咗條每六十分鐘有三分鐘豁免嘅屎橋，問題係，呢三分鐘點樣計？真係口同鼻拗。

如果有日捉到一個名人，佢可能唔服氣，為咗打甩三百二十蚊罰款，不惜出幾百萬搵大狀同專家打官司，將執法者隻膠錶呈堂驗屍，一驗之下，原來因地心吸力引致產生誤差而計多一秒喎！為咗應付呢啲富貴刁民，話唔定要向執法者分發一人一隻超勁貴陀飛輪。

Email：sunsiupak@gmail.com

Blog：http://sunsiupak.blogspot.com

阿豪觀點：邱騰華自我感覺良好

吹水吹咗咁耐，當局終於宣布即將提交停車熄匙立法草案。睇吓個內容，竟然新嘢欠奉，只係引入所有車輛可以每個鐘豁免三分鐘唔使熄匙。唉，大家一早都提醒過政府，咁搞法一定大把爭拗，淨係三分鐘點計法都審死官。香港社會已經唔和諧，仲要惹民憤添煩添亂，呢個政府到底諗乜㗎？

最好笑嘅係，邱騰華仲當係政績咁係咁吹，話係吸納咗環保團體同運輸業界意見喎，點知話口未完，即刻有環保團體走出嚟嘈，話三分鐘豁免，即係放生晒啲職業司機。咁即係話，司機又嘈，環保組織又唔妥，根本就係兩面都唔討好，都唔知邱騰華有咩咁值得沾沾自喜。

係喎，爭啲唔記得添，違反停車熄匙規定嘅司機，係要罰三百二，連同已經實施嘅膠袋稅，環境局嘅「創收」表現已唔錯，邱騰華今次仲唔可以向煲呔曾邀功？

Email：lukchiho75@hotmail.com

Blog：http://lukchiho.blogspot.com

網友觀點……

小山：加拿大天氣同香港唔同，停車熄匙容易得多，點能參考？

駱駝祥：香港夏天特別濕熱，喺較熱嘅月份可彈性執行吖。

阿水：司機唔多接受，睇嚟邱局長要學特首搞個電視錄影講話喇。

賓仔：為免呢三分鐘爭拗，到時執法人員要帶埋攝錄機。