咖啡連鎖店星巴克（Starbucks）喺香港落地生根已經十年，佢哋將喺中環交易廣場開設嘅首間分店換上新貌，前日重新開幕。身為Starbucks香港合作夥伴揸Fit人嘅美心集團主席兼董事總經理Michael伍偉國，同喺美國過嚟嘅Starbucks公司主席、總裁兼首席執行官Howard Schultz等一眾高層，齊齊主持剪綵儀式。
平時甚少出席公開場合嘅伍太羅寶盈，仲陪住伍偉國嫲嫲排排坐。Michael雖然係大忙人，都一樣係好老公，佢話閒時會親手煮浪漫咖啡氹老婆，仲會同老婆拍拖帶兩歲幾嘅大仔同未夠一歲嘅細仔去星巴克，當然囝囝唔係飲咖啡飲品，而係飲奶類飲品啦。
佢嘅叔公、叔婆同嫲嫲都一樣早早嚟到撐乖孫。揸住拐杖、坐住輪椅出入嘅叔公、美心集團創辦人伍沾德，更上台主持開幕禮。儀式後，三位精靈長輩仲坐低歎杯咖啡食件餅添。