本文重點
煲呔曾平均每三個月上一次立法會答問會,今次罕有咁黐住預算案表決日,點知就被佢嘅「真兄弟」財爺鬍鬚曾阻頭阻勢。議員尋日收到秘書處通知,原定下禮拜三舉行嘅答問會要改期,押後一日,理由係今年對預算案嘅修正案多達九項,以致難以估計喺禮拜四下午三點前能否表決到預算案。要預留咁多時間,睇怕都因為預算案太爛,議員鬧一日都鬧唔完。
仲記得舊年立法會表決預算案,撞啱幾個建制派議員有事要「告假」,加上翌日至少有八人跟隨政務司司長北上,同廣東省省委書記汪洋見面,政府為咗爭取最多支持票,夾硬焗立法會要通宵辯論完表決,最終亦要硬食二十二張反對票,無法改變打破梁錦松○三年嘅二十一張反對票紀錄嘅命運,亦害到全體議員捱夜。
預算案實畀議員鬧爆
吸取舊年教訓,今年立法會仲敢鬆懈?鬍鬚曾今年份預算案完全冇料到,被指無力遏抑社會最關注嘅樓價高企問題,又解決唔到最深層矛盾之一嘅貧富懸殊問題,中產冇受惠,基層繼續苦,議員唔鬧爆至出奇!民主派今年隨時重演拉布戰,唔通又叫班建制派議員開夜車咩?你估保皇黨真係奉旨要保你鬍鬚曾㗎!立法會預留多一日辯論,當係同鬍鬚曾買定保險,但就阻住煲呔曾上答問會,呢鋪算唔算「孖曾」自己人打自己人呢?