身兼港交所主席嘅行政會議成員阿Ron夏佳理又同傳媒朋友開賭局，但今次開局之前，佢先要賠錢。阿Ron上次做莊，同大家賭立法會有幾多人辭職，結果估中五人辭職嘅傳媒朋友唔止一個，所以阿Ron就要賠幾百蚊嘞！
五區補選臨近，今次大家再開兩個盤，首先係估五個辭職嘅立法會議員能否喺補選後全體重返議會，阿Ron再次做莊，話如果有傳媒朋友買五個議員都順利重返議會，賠率係一賠十。大家見咁吸引，當然踴躍落盤啦！
另一個賭盤係估補選投票率，傳媒朋友由逾一成至三成都有人估，阿Ron就估有兩成幾，呢個賭盤嘅玩法係冇人做莊，邊個估得最接近就可以通殺。
依家有啲網民
實班問責高官會唔會喺五月十六號補選日投票，咁身兼行政會議成員嘅阿Ron又點打算呢？佢話投票當日咁啱菲律賓嘅親家八十大壽，佢要飛去宿霧賀壽喎，所以唔會投票嘞！財爺鬍鬚曾喺補選前將率團外訪，阿Ron又話嗰日要去宿霧賀親家，睇怕嗰日可能仲有好多名人會離港，費事麻煩。