政府委任全國政協委員李大壯做「香港－台灣商貿合作委員會」主席冇耐，日前爆出佢租住嘅中環花園道豪宅愛都大廈中層單位被人追租約四十萬元，仲鬧到上法庭，被業主要求收樓。李大壯尋日回覆查詢時承認，單位用公司名義租賃，係公司職員睇漏眼所以冇交租。
自言喺愛都大廈住咗近十年嘅李大壯，以月租九萬五千蚊租住中層一個單位連車位，但佢由舊年十二月開始欠租，業主前日入稟高等法院追欠租。佢解釋，個單位係佢同家人自住，由於「公司內部出現疏忽」，自己又太忙，冇時間跟進，所以先搞到欠租，佢話自己都有責任。
問佢怕唔怕被人覺得冇錢交租，佢笑住話：「人哋點睇、點樣幻想，我控制唔到，亦毋須解釋。」佢又話開公司做生意，資金轉嚟轉去，拖數有時實會有，只係今次公司以為只係欠咗一、兩個月租，後來至知係四個月，所以前日佢一返港，即刻簽支票清還所有欠租。