本文重點
富貴黨嘅立法會飲食界議員「廿蚊張」張宇人向外界道歉後沉默咗一段時間，據聞佢下禮拜二會重出江湖。電台節目主持引述餐飲聯業協會會長黃家和話，飲食界已喺復活節期間完成最低工資水平調查，結果係高過廿蚊少少，數據已交畀廿蚊張，等下禮拜二臨時最低工資委員會、政府同飲食業界舉行三方會談後正式公布，屆時廿蚊張就會現身。
清潔女工鬧完佢被炒
上月底「城市論壇」上演清潔女工劉玉珍狠批廿蚊張嘅激烈情節，咪以為「瓷器撼缸瓦」，畀人鬧嘅廿蚊張蝕底晒，其實個女工仲傷，鬧完之後冇咗份工。劉玉珍話喺論壇後老闆再冇搵佢開工，仲喺電話單打佢話：「你咁叻，去做明星囉，唔使返嚟洗碗喇！」
廿蚊張話既然飲食業界完成調查最低工資數據，冇理由自己公布咗至提交畀臨時最低工資委員會，所以決定喺下禮拜二委員會開會後一併公布。佢仲話唔會評論別人嘅批評，而劉玉珍被炒更加唔關佢事，事關佢根本唔知邊個係劉玉珍嘅老闆喎！