泛民尋日開禮拜五嘅「飯盒會」，就呢四項修訂分晒工，當然少不免會講吓公社兩黨所謂嘅「變相公投」、立法會五區補選啦，事關工聯會嘅「阿王」王國興準備提出修訂，要求剔除政制及內地事務局為五區補選嗰近一億五千萬元嘅經費，若果真係成功否決咗筆撥款，咁就真係「窩河」囉！所以佢哋都要傾吓有乜對策。

唔知泛民邊個議員竟然忽發奇想，要求立法會秘書處澄清三點，包括政府保證承擔法定責任會搞補選、補選如期舉行同埋票站唔會減少，既然對補選完全冇影響，咁佢哋喺表決阿王嘅修訂時，十八個泛民議員就會walk out，等佢哋否決補選經費撥款。

隨時誤中選舉事務處

依佢哋嘅諗法，否決咗近一億五千萬元經費，就等如變相減政制及內地事務局局長「林公公」林瑞麟嘅人工，林公公月薪逾二十八萬元，除番選舉經費總數，就等於減佢四十三年人工；若果計埋佢嘅副局長黃靜文在內，咁都減足二十五年半。

咁你話嘞，減一個月人工變咗減四十三年人工，睇怕成個局都唔使運作，啲職員仲邊有士氣呀？你睇死減人工修訂過唔到，就偏偏玩謝你，呢次仲要係擺阿王上枱玩謝林公公添！總之就要當場落林公公面，令佢尷尬。

之不過，泛民都唔好開心得咁早，分分鐘捉蟲㗎！事關阿王個修訂唔係擺喺政制及內地事務局欄目，而係擺喺選舉事務處，佢哋walk out分分鐘係cut咗選舉事務處嘅資源，咁就變咗誤中副車，總選舉事務主任丁徐慧明就真係多得佢哋唔少！