16/04/2010

播放本新聞相關短片

環保騷搞搞震 假減排真擾民

駕車人士請注意,第日千祈Check清楚帶咗以下物品至可以揸車上路:簿仔、計數機、精確度極高嘅計時器。如果揸的士、小巴呢類搵食車嘅,建議帶埋高倍數望遠鏡。

以上係根據港府準備月底向立法會提交嘅《汽車引擎空轉(定額罰款)條例草案》建議嘅「非溫馨提示」。草案個名係咪好拗口呢?其實咪即係噏咗N年嘅停車熄匙囉。

環境局局長邱騰華尋日話,建議所有汽車每六十分鐘時段可享有三分鐘「寬限時間」,換言之,停一粒鐘,有五十七分鐘唔能夠撻着引擎,否則罰款三百二十蚊,庫房多謝盛惠。

如果喺旺角同牛頭角分別停咗半粒鐘,係咪應該各「寬限」三分鐘呢?唔知。穩陣起見,唔該帶齊上面提到嘅出車「三件寶」,記清楚時間地點由執法人員定奪。

搵食車司機就煩咯,修訂措施仲包括:的士站豁免範圍由頭兩架的士,擴大到頭五架;綠色小巴站豁免範圍由頭兩架小巴,擴大到每條路線嘅頭兩架;紅色小巴站豁免範圍就更複雜,總之又煩又亂,唔用望遠鏡睇清啲計準啲,唔覺意收到張「牛肉乾」,咁就喊都無謂喇。

仲有更怪雞o架,原來非專利巴士車廂內至少有一位乘客,又可以獲得豁免o架。咁講,假如有人搵個自己友坐喺車上,咪即係有「免死金牌」?「寬限」、「豁免」複雜到嘔,唔止揸車嘅煩,執法嘅更煩。睇得呢頭,顧唔到嗰頭,計得呢架又計唔到嗰架,司機同執法人員嘅爭拗勢必愈來愈多。

叮!呢度「寬限」,嗰度又「豁免」,正如環保組織人士話齋,咁做等於放晒小巴、的士同旅遊巴司機咁滯,停車熄匙都唔知搞嚟做乜。唉,政府又點會死錯人呀,咁「手鬆」,無非想降低業界反對聲音,等停車熄匙呢個「怪胎」條例盡快通過啫。

講真,當局「減排」、「環保」嗌咗咁多年,成績係點有目共睹。環保署資料顯示,本港每年人均碳排放量持續飆升,○七年已經比全球平均水平多出近半,空氣質素已經令人忍無可忍。

叮!改善空氣質素其實大把嘢可以做,譬如盡快淘汰高污染嘅舊式柴油車、大力推動電動車、限制屏風樓等等,同樣重要嘅係,同廣東省方面共同協作,改善區域空氣環境。

但港府捨難取易,應做唔做,改善空氣一事無成,咪惟有做下騷,敷衍輿論囉。呢嗱,好似收咗錢又唔用於環保嘅膠袋稅、藉機斂財嘅排污費、得不償失嘅慳電膽計劃咁,統統都係冇嘢搵嘢嚟搞,停車熄匙更加無厘頭,直情就係擾民靠害。

早排沙塵暴南下搞到污染指數爆燈,市民抬頭不見天日。邱騰華條「絕世好橋」,居然又係叫市民停車熄匙,根本九唔搭八。來來去去得呢招,計太一叮話齋,邱局長不如改名叫「邱一招」罷啦。叮!