16/04/2010

播放本新聞相關短片

政情:高達約Eva硬食檸檬

立法會下禮拜表決財政預算案,泛民主派提出要政制及內地事務局、運輸及房屋局、勞工及福利局同教育局嘅局長每人減一個月人工等四項修訂,算係當佢哋推動政改不力、搞高鐵諮詢一塌糊塗等連串管治問題嘅小小懲罰。

想翹埋雙手唔做?

雖然都知呢啲修訂過唔到嘅機會率甚高,但同運輸及房屋局局長Eva鄭汝樺交手最多嘅白鴿黨議員「高達」李永達就透露,Eva私下同佢講笑咁講:「減咗人工,其實唔使做仲好!」

係咪真呀?究竟佢係想話冇咁容易減到佢人工吖,定係減咗人工佢劈炮唔撈抑或係翹埋雙手唔做呀?咁就要佢先知嘞!

講真嗰句,高鐵通過咗後,Eva似乎連議員都唔想理。事關最近部分地產商銷售手法愈嚟愈多問題,高達想約佢傾吓可以點處理,仲只係要求半粒鐘時間見面,高達心知見官難,特登劃咗三個禮拜出嚟,每日朝早八點至夜晚十二點任Eva揀,點知Eva只係同佢講:「唉!你知我好忙㗎啦!」就當回應咗高達訴求。高達見佢毫無誠意,惟有由今日起密密寫信畀Eva投訴。