16/04/2010

播放本新聞相關短片

政情:鬍鬚曾飛俄羅斯避補選

公社兩黨搞「變相公投」,煲呔曾早前率先縮骨話去唔去投票要諗過度過,畀泛民主派鬧爆,正當班問責高官頭痕緊去唔去投票之際,有消息話煲呔曾嘅「真兄弟」財爺鬍鬚曾諗住下個月帶班銀行同物流業界嘅代表出訪俄羅斯。

雖然呢個觀摩團嘅行程仲未定實,睇怕財經事務局局長「傻強」陳家強同副局長梁鳳儀應該有份去嘅,而肯定嘅係個訪問團會喺補選前起行,五月二十幾號先返嚟,只要鬍鬚曾等財金官員跳咗上飛機,應該可以避開五月十六號嘅投票日。咦!又會咁啱嘅,有啲蹺蹊喎!「五區公投」聯合委員會發言人余若薇就大鬧鬍鬚曾鬼祟,根本係借意杯葛「公投」。

之不過,鬍鬚曾係咪可安心喺俄羅斯跳民族舞真係好難講,仲記得一月佢原本率財金官員訪京,但北京連日大風雪致未能成行。希望俄羅斯唔會五月飛霜啦,否則佢又打錯算盤,到時就要跳補選呢個火圈嘞!