「獎門人」曾志偉前晚大搞生日會，佢嘅表哥、中策集團主席馬時亨都有撐場，但肥亨因為啱啱去完美加返港好攰，所以逗留咗粒半鐘就離開，獎門人親自送客，臨別前同肥亨擁抱一番。肥亨之前美加之旅主要為傳教機構「恩雨之聲」演講籌款，籌得折合過百萬港元善款之餘，仲有好多人因為佢嘅「見證」而信主添！
講開美加之旅，肥亨特別提起兩件驚險遭遇。喺佢出發當日，去到機場先醒起唔記得帶護照，於是拜託太太Linda王培琪趕返屋企攞，好彩機場快線夠快，最終趕得切上機。肥亨上到機以為安樂晒啦，點知飛機駛到跑道時，機上突然有乘客發羊吊（癲癇症），航機即時要返回停機坪將病人接走，令航班延誤一粒鐘至起飛，但佢仍趕得及參加溫哥華首場晚宴演講。
近年Linda每逢五月都會統籌喺大球場舉行嘅世界祈禱日活動，今年已經係最後一年，Linda獲邀到發源地南非參加祈禱日，香港呢邊就交畀肥亨主持大局嘞！