16/04/2010

播放本新聞相關短片

政情:邱騰華學煲呔曾龜縮

停車熄匙同港人日常生活息息相關,環境局局長邱騰華好應該向市民詳細解釋政策同執行上嘅細節,最好嘅方法當然係召開記者會,但佢尋日急Call記者去政府總部宣布相關事宜,對住鏡頭係咁意講五分鐘左右就閃,期間只點題式話會畀司機三分鐘時間作緩衝,至於點樣計時、邊個執法等完全冇解答,搞到在場記者一頭霧水,最後要新聞官打圓場,叫記者有乜唔明就喺簡介會上問喎。

但簡介會中所有官員嘅發言只可用「政府消息」引述,即使講錯說話都冇人知,令市民想問責都無從問起。今時今日仲係咁嘅態度,難怪政府民望咁低!

仲記得喺舊年嘅慳電膽事件上,煲呔曾被指明益親家,邱騰華亦成為眾矢之的,唔知佢係咪見過鬼怕黑,所以都染上龜縮惡習,好似年初公布廢電器電子產品生產者責任計劃時,佢都係用呢招。

其實,最常用呢招嘅,怕且要數教育局局長孫明揚,佢早前推出中學「五減一」自願縮班方案同推銷新教學語言政策時,都係公開對傳媒噏幾句後,再搞個簡介會補飛。

不過,要數龜縮佼佼者,非煲呔曾莫屬,好似前日政府公布政改方案咁大件事,佢竟然只係發表預早錄影嘅電視講話當交差,怪唔得啲問責局長有樣學樣,縮得就縮!