菁英會同百仁基金都喺今年換屆，菁英會主席Jamie施榮忻會喺六月底正式卸任，繼而喺七月起擔任百仁基金主席，而前主席、恒基地產副主席李家傑就會擔任榮譽創會主席。Jamie卸任前最開心係睇到菁英會成功申辦年底第二屆「博鰲青年論壇」，其次係菁英會多咗位生力軍，就係中華總商會榮譽會長霍震寰囝囝霍啟文嘞。
霍震寰係博鰲亞洲論壇嘅開荒牛，今次首度帶囝囝參加咁重要嘅會議，莫非係部署交棒？但Jamie透露，啟文今年內會加入菁英會，呢趟赴「博鰲」係支持菁英會就真。身兼菁英會副主席嘅霍啟剛、細佬啟山都有出席。
Jamie同啟剛更代表香港參加博鰲亞洲論壇「青年領袖圓桌會議」，Jamie今年係第三次發言，分別建議港深攜手申辦低碳亞運會，同埋指出互聯網存在嘅監管漏洞。