因廿蚊論畀外界狂轟冷血嘅廿蚊張負責講「關愛社會」咁諷刺，唔少人都特登豎起隻耳仔聽清楚佢噏乜。之但係佢嘅「偉論」只係一味喺度炒人冷飯，毫無驚喜不特止，對最低工資呢個議題仲左閃右避，只係輕輕帶過話依家嘅基層人士好多都係勞動階層，難以爭取較好待遇喎。佢講啲嘢 Hea到咁，莫講話洗底，要人專心聽佢講嘢都難啦！

之不過，大家唔好以為廿蚊張唔再講最低工資係因為佢知衰喎，事關佢嗰頭死死地氣喺議事廳內講廢話，但喺議事廳外又大大聲聲話自己對城市論壇「未驚過」。

廿蚊張仲話自己係有膽之人，「我喺尖沙咀搞飲食業搞咗咁多年，有乜嘢場面未見過？恐嚇？我未驚過！」但佢就話佢唔驚唔代表佢啲同事唔驚喎，事關每個人嘅成長背景都唔同。

建制派前晚有個飯局熱論城市論壇，大家七嘴八舌咁話要杯葛，唯獨Miriam話為咗業界利益，佢都會去㗎！唔知係咪因為黨主席咁夠泡，一副勁揪俠咁嘅款，所以廿蚊張都有樣學樣呢？但佢喺議事廳內外前後不一嘅表現，就令人覺得佢應該喺勁揪俠前加多個「扮」字，即係扮勁揪！

大輝唔怕畀銀紙掟

轉頭工業界議員林大輝竟然酸溜溜咁自爆冇人邀請佢上城市論壇，佢對上嗰次上去已經係好多年前，慨嘆冇人重視工業界。

大輝話若果有人向佢掟廿蚊，佢一定接住，仲話最好掟多幾張，好似粵語長片咁一大疊銀紙掟畀佢就更好，但記緊唔好掟十蚊銀，否則掟中佢雙眼就唔好啦。查實大輝之前已經呻過話自己知名度低，睇嚟佢咁講都係想下戰書扮勁揪博提高知名度啫！係咪咁勁，等人哋請佢出壇就知嘞！

可能見到建制派群情洶湧，港台方面尋日話會檢討城市論壇嘅安排，但同時又話杯葛出席論壇唔係好嘅辦法，呼籲班議員繼續面對群眾。