16/04/2010

播放本新聞相關短片

任意網為:亞視翻生有望

小白觀點:CEO索過旗下奀星

亞視CEO胡競英預期兩年內做到收支平衡,仲好感性眼濕濕咁話以員工為榮。唔係啩,霉香鹹魚都可以翻生?有冇咁巴閉呀?唔好話兩年吖,依家連老闆係邊個都唔知,現金只夠撐一個月,牌照費都拖,兩日內發生乜事都唔知啦!

大家可能冇聽清楚,胡總呢個「兩年收支平衡論」,附帶嘅條件水蛇春咁長,既要經濟環境冇逆轉,又要管理層穩定,單係呢兩點已經難過登天啦。與其都係吹水,不如再作大啲,話兩年內追過BBC同CNN吖笨,不過先決條件係BBC執笠,CNN畀拉登炸咗。

不過我又覺得亞視唔係話冇得搞嘅,如果唔係有呢個記招,實冇人知呢間電視台嘅CEO仲索過旗下女奀星,睇到好多麻甩佬吞晒口水,原來佢用藝名胡冠珍拍過好多戲,相信再搵番譚詠麟出嚟拍套《假如我是真的之二○一○》,播足七個Season,應該可以搶番唔少收視。

Blog:http://sunsiupak.blogspot.com

阿豪觀點:隔籬台拍劇揸流攤

亞視認真巴閉,啱啱至話有倒閉危機,仲講到牌費都要拖,轉個頭佢哋高層又話可以喺兩年內收支平衡,叫大家信邊個好呀?不過睇佢哋高層出嚟解畫,吞吞吐吐、顧左右而言他咁,有乜說服力呀?

真係想像唔到一間電視台倒閉係咩場面,會唔會好似啲海鮮酒家執笠咁,啲員工攞齊架生,撈起晒啲龍蝦海鮮返屋企呢?假設電視台真係執笠,啲員工又真係攞走啲大型器材返屋企,唔食得之餘仲有咩用呢?睇怕二叔公都唔收啦!

不過豪伯出於私心,都係唔想亞視摺埋。一來冇競爭就冇進步,依家隔籬台拍嘅劇集已經嚟嚟去去三幅被,將來只此一家,佢哋索性播雪花都似!最重要嘅係,豪伯依家夜晚追緊佢哋重播嗰套《滿清十三皇朝》,喂,起碼畀我睇埋雍正最後點樣鬥贏佢班兄弟登上帝位先都得啩!

Blog:http://lukchiho.blogspot.com

網友觀點

公公:唔係咁講又點可以安撫到人心呢。

多口仔:要呢條鹹魚翻生,除非搵到個神仙入股啦!

周仔:個CEO話做到自己養自己,唔知係咪暗示員工要食自己呢?

阿休:假如亞視嘅收視率喺兩年內能改善,收支平衡唔奇吖。