胡佳係乜水？佢係內地維權人士，被法院判入獄三年，最近申請保外就醫被拒，家陣仲服緊刑。《南早》將國家主席與囚犯混為一談，都唔知係乜居心，究竟係鬼掩眼，定係有人專登搞搞震？

講真，呢份西報不嬲陰陽怪氣，以前都試過搵法師高僧入報社作法啦，可惜唔知係大師法力唔夠，定係鬼氣實在太重，結果愈驅愈多鬼，所以話係鬼掩眼，一啲都唔奇。之不過，「胡錦濤」係三個字，就算鬼掩眼，最多都係變成「錦-濤-胡」，或者「胡-濤-錦」、「錦-胡-濤」，點都冇可能三個字變成兩個字，仲要係「胡佳」，錯到咁離譜喇！

其實，呢張西報不嬲一講到反中亂港就興奮莫名，猛鬼上身，阿媽係邊個都唔記得，話之你係國家領導人啦。最搞笑嘅係，《南早》連自己嘅老闆都照搞，上演過狗咬狗骨嘅鬧劇。話說當年《南早》老闆郭鶴年同一班本港富豪上京訪問，本來相安無事，勢估唔到該報有高層撰文冷嘲熱諷，話北京邀請佢哋，係要統一本港富豪思想，仲單單打打，鬧郭鶴年等人係北京「走狗」，搞到郭鶴年要投稿該報「讀者來函」反擊。老闆同伙記互插，古今中外，睇怕都係只此一家，實在令人嘆為觀止。《南早》管理有幾混亂，可想而知。叮！

仲有噃，呢張不中不西嘅報紙不嬲見錢開眼，近年銷量暴跌，更係發晒窮惡，為咗促銷，不惜譁眾取寵、妖言惑眾，放流料就好似食生菜。前年金融海嘯鋪天蓋地而來，該報發放所謂獨家猛料，話中國銀監會禁止內地銀行向美國金融機構拆借資金，搞到中銀監要出面澄清，話根本冇其事，仲直斥《南早》未經核實，擅自發表不負責任言論，中銀監保留追究法律責任嘅權利。《南早》現眼報，獨家猛料變毒家猛料，乜架都丟晒。

《南早》喺港英時代，係英國人嘅喉舌，以建制報紙自居，可惜今時唔同往日，英國主子返咗祖家，鬼佬又走得七七八八，香港人個個北望神州，又有幾多人睇西報噃？事到如今，權威地位冇咗，銷量又一日不如一日，正所謂日薄西山，窮途末路。

一句講晒，《南早》作嘢當食生菜，誠信破產，如果有人想喺該報刊登訃聞或者結婚啟事等等，最緊要先諗清諗楚，否則，一個唔覺意又畀人改名改姓，公乸不分，白事變紅事，紅事變白事，咁就大件事喇！