近年特區政府被譏變咗「伸手牌」，由個人遊、CEPA到人民幣業務甚至放寬深圳非戶籍居民來港旅遊等等都係例子，唔少港人質疑政府高層振興經濟無方，只識「攞着數」。財爺鬍鬚曾尋日出席一個政黨午餐會時，就大言不慚咁話中港經濟互補係互惠互利，係兩地合作嘅基本動力，唔應該被理解為「伸手攞着數」，即係話，過去內地推出嘅措施都唔係送禮。佢呢種「不求人」嘅諗法到底係自以為是，定係扮自信呢？
鬍鬚曾喺個午餐會上回顧咗幾十年嚟本港同內地經濟嘅變遷，由五十年代韓戰同對華禁運，到七十年代石油危機同七三股災，一路講到八十年代香港前途問題，即使答問環節，台下問金融發展、六大產業等，鬍鬚曾都係搬出舊答案重複一次，炒冷飯之餘，仲流露一副等收工嘅態度。
講到早前同內地簽訂「粵港合作框架協議」，佢話香港嘅重要性係「軟實力」，指本港喺人文、教育以至法制都有領導位置。不過，佢同時又話以前內地人偷渡來港，會一直向南行，見到有光嘅地方就知係香港，依家如果以為較黑嗰邊係內地，咁就會去錯地方。即係話香港呢顆「東方之珠」愈嚟愈黯淡無光啫！