廣州今年嘅盛事係亞運會，一向重視體育嘅霍家，日前有首次進身做廣州市政協委員嘅啟山喺市政協會議提案，借亞運東風傳揚廣東價值，圖發展廣州為國際城市，仲建議廣州市政府將「廣州榮譽市民」名銜授予國際奧委會主席羅格等名人；而佢哥哥啟剛原來都有投身亞運工作，仲預先張揚可以幫細佬。
啟剛獲廣州亞組委委任做廣州亞運會香港賽會志願者隊伍團長，幫手帶領招募同培訓香港志願者嘅籌備工作，佢同香港志願者協會嘅主席葉振都喺青聯合作無間，今次又要聯手發功。啟剛係香港奧委會副義務秘書，同羅格老友鬼鬼，問到佢有冇順便幫細佬聯絡羅格，佢話：「冇呀！如果啟山開聲我一定幫手做說客。」佢對啟山嘅辦事能力好有信心，仲話細佬絕對可以獨當一面做好呢份工。
早排郭晶晶畀人影到喺上海行街，身形仲脹卜卜，啟剛話冇睇過呢段新聞，仲反問邊度有得睇。佢同晶晶多年嚟戀聞不絕，一時傳結婚一時又傳有孕，今次又點呢？佢叫大家對傳聞唔好咁八卦喎。