樓價狂飆，政府出招無力，又無意復建居屋，運輸及房屋局局長Eva鄭汝樺日前突然出三招規管地產發展局，希望向樓市淋水，但係民怨依然難平。曾經做過特區政府經濟顧問嘅港大經濟金融學院榮譽高級研究員郭國全，尋日出席一個樓市座談會時，亦出聲質疑政府嘅公屋政策，認為政府應該重新檢討。
郭國全當日急急離開政府，引嚟唔少猜測。尋日佢以港大學者身份露面時，言談自由好多，佢話本港現時有四成六住宅為公屋，但係租者置其屋計劃推行以嚟，交投好少，完全冇增加流動性嘅效果。佢嘅意思係公屋買家做咗業主之後，好少賣出房屋，亦冇喺房屋階梯上細樓換大樓，或者郊區換市區，結果政府推出公屋出售計劃成十年，樓市依然幾年一炒，民間依然有大把冇殼蝸牛。唔知Eva會唔會好好研究吓郭國全嘅建議呢﹖