政府花咗六百萬更新嘅七彩飛龍，惹嚟各方批評，仲搞到一啲相關機構好麻煩。旅遊發展局尋日搞咗個記者會，為七月大搞嘅香港龍舟嘉年華做宣傳，主席田北俊親身上陣，但擺喺佢身後嘅宣傳易拉架，卻印住「紅卜卜」嘅舊版飛龍，唔通連旅發局都柴政府台？
田少未得閒解畫，旅發局總幹事劉鎮漢就急急話，財爺鬍鬚曾都話逐步嚟，等啲舊宣傳品用晒先，所以佢哋唔可以浪費。佢仲解釋，呢批易拉架年頭已經印咗，估計下月印新宣傳小冊子嗰陣，飛龍就會換新面貌。
另外，為慶祝旅發局首度同香港龍舟協會合作，今年一齊大搞國際龍舟邀請賽，田少尋日同龍舟協會主席馬兆榮喺支一比一的龍舟槳上面簽名。據聞旅發局主席過去都好少喺展品上簽大名，今次都係田少上任以嚟第一次，之後支龍舟槳會擺喺旅發局總部做留念。