話冇經手人識中文

個圖片故事係講述胡錦濤前日搭專機抵達美國馬里蘭州空軍基地，受到美國官員歡迎嘅一幕。出現咁大嘅錯誤，《南早》事後補鑊，發言人聲稱處理呢單新聞由記者到編輯以至校對，所有「經手人」都係非華語人士，簡單啲講就係唔識中文，所以辯稱出現今次嚴重失誤純屬人為錯誤。發言人仲話，今日會就件事喺頭版登道歉啟事，又對事件深表遺憾，承諾一定會嚴肅處理事件，全面檢討校對過程，避免同類事情再發生喎。

聽完《南早》嘅解釋，更加令人對呢次出錯感到驚訝。首先，「胡錦濤」個名有三個字，「胡佳」連名帶姓都係得兩個字，加上二人除咗同姓之外，兩個名嘅讀音、寫法完全唔同，即使唔識中文，只要稍為用心編審、校對，絕對冇可能出現咁嘅大錯誤，更何況仲係經常喺佢哋《南早》見報嘅胡錦濤添，所以點講都講唔通。更教人驚訝嘅地方係，雖然《南早》係英文報章，但一旦涉及內地嘅人名同地名，通常都會加注中文，估唔到咁大間報館竟然連頭版故事都會咁輕率處理。《南早》話晒都係喺香港發行嘅報紙，係畀香港人或者關心香港嘅人睇，莫非連一個識中文嘅編輯、校對都冇？若然真係咁樣，簡直令人匪夷所思，否則《南早》咁解釋，就純屬推搪之辭。

《南早》出事都唔係第一次喇！記得二○○○年六月，香港工商界代表團往北京同江澤民、朱鎔基等國家領導人會面，多位超級富豪都喺獲邀之列，當中包括《南早》大老闆、嘉里集團主席郭鶴年，點知時任《南早》中國新聞編輯嘅林和立，竟然喺同月二十八號以三分之二版面，撰文話北京以商機交換港商支持前特首董建華連任，搞到郭鶴年後來要以「讀者來函」方式，喺番《南早》撰文，批評林和立嘅文章將港商視為「蠢才和笨蛋」，質疑佢嘅新聞專業操守同良知。《南早》連自己嘅員工都管唔掂，可見其內部管理何其混亂，今次出現咁大嘅錯誤，莫非真係有人有心整蠱胡錦濤？