小白觀點：港女理想夫婿未面世

內地有調查發現，六成廣州女大學生想嫁富二代，認為「幹得好不如嫁得好」。至於剩低嗰幾成又點諗呢？哈，原來有三成人希望嫁畀公務員，引用「我不貪污，當官幹啥？」呢句豪言壯語，亦即係希望嫁畀貪官。廣州女仔冇矯揉造作，一心一意釣「污龜」，目標明確兼且有遠見，值得一讚！

如果同樣一個調查喺香港做，九成九以上嘅香港女生一定話：「有冇吳彥祖咁靚仔都係其次，冇幾層樓揸手亦都唔係問題，最緊要係有上進心同埋錫我就得㗎喇！」如果真係咁簡單，香港就唔會有咁多宅男冇着落啦！

喺港女心目中，做唔到CEO、住唔到中半山就係冇上進心；過時過節唔送隻鑽戒就係唔錫佢。佢哋要嘅男人，上帝仲未創造到出嚟，搞到港女一個二個變晒中女熟女剩女，抵死！

Email：sunsiupak@gmail.com

Blog：http://sunsiupak.blogspot.com

阿豪觀點：邊有人唔想中六合彩

有調查發現，近六成廣州女大學生願意嫁畀「富二代」，原因係可以少奮鬥好多年喎……唉，睇嚟呢個世界真係好現實。不過咁，剩低嗰四成又係咩諗法呢？莫非已經成功釣到金龜？

豪伯咁講，絕對唔係無的放矢㗎，大家諗吓啲順口溜呀，例如「十個男人九個嫖，還有一個在動搖」，又好似「十條政見九條騙，還有一條待考驗」，諸如此類不一而足，所以呢，多口問一句係好有必要嘅。

老實講，一睇呢個調查就覺得有古怪，想釣金龜嘅點會得六成咁少呀？你試吓隨街問人想唔想中六合彩，你睇吓幾多人會答唔想吖嗱？如果要更加科學化，應該問得深入啲，好似話如果個富二代好似八両金，而個窮二代好似金城武，你點揀？又例如，如果畀你真係嫁到個富二代，你肯短幾多年命等等，再計算出一個加權平均數，咁就差唔多嘞！

Email：lukchiho75@hotmail.com

Blog：http://lukchiho.blogspot.com

網友觀點……

賓仔：若要生活好，嫁個二世祖。

窮二代：男生何嘗唔係想娶個富二代吖，打跛腳都唔使憂！

阿水：書讀得愈多愈明白嫁入豪門比為祖國建設實際得多？

狒狒：做「富一代」嘅情婦二奶，都係一個唔錯嘅選擇。