話口未完，又有新畸士。政府以推動基層醫療為由，撥款二億幾喺衞生署設立基層醫療統籌處，增開兩個首長級同埋十五個非首長級公務員職位。淨係呢班官員嘅薪酬福利，每年就要開支一千五百六十幾萬，而佢哋嘅職責，無非係制訂一啲醫療服務指引。

太一叮諗極都唔明，特區政府唔通從來冇人管理基層醫療咩？因乜事回歸十幾年，依家先至新設咁嘅機構？查吓文件，原來食衞局裏面已經有兩個首長級公務員管理基層醫療政策，下面仲有一班高級醫生、醫生、政務主任，直情人才濟濟。

咁有咗基層醫療統籌處，呢班人又做乜嘢？政府就話，佢哋會繼續留喺食衞局負責發展基層醫療政策。咁咪即係一份工兩個人做？講得直接啲，叫做疊床架屋！

其實，發展基層醫療本來就係衞生署嘅職責，佢哋唔做係失職。當局唔追究衞生署責任，仲要為佢開新職位，實在荒謬。正如有立法會議員話齋，衞生署失職竟成為開設統籌處嘅理由，實在好難接受。叮！

政府為咗推銷新機構，猛講基層醫療有幾重要。鬼唔知阿媽係女人咩。不過，要為基層市民提供醫療服務，唔可以靠設多幾個官位，寫多幾份指引，而要增加前線醫護人手，提升醫療服務質素。

講出嚟可能好多人會唔信，因為人手不足，家陣公營門診醫生平均睇一個症只用三四分鐘，外科病房更唔使恨，醫生每周閒閒地要做五六十粒鐘。咁搞法，唔出事至奇，近年開錯刀、配錯藥、打錯針等事故無日無之，近排又發明咗「人體儲物」，陰道留紗布、肺部留刀片、胰臟留銅板，無奇不有。

最得人驚仲係日前嗰單滾水淥嬰事件，一個大頭蝦護士幫三個月大ＢＢ沖涼，居然唔試水溫，令細路嚴重燙傷，以後會唔會影響生育能力仲未知。話時話，求其去街市搵個師奶返嚟，都唔會搞到咁大鑊啦。醫院點做嘢o架？

難為食衞局局長周一嶽仲好似無其事咁，佢話喎，事件唔尋常，完全可以避免，醫管局應盡快向公眾交代醫護人員有冇跟足程序去做，並從中學習。叮佢個鎯鎯，你就口輕輕嘞，人哋差啲絕子絕孫噃！其實都預咗㗎嘞，次次出咗事故，周一嶽都話要改善服務，但都係大隻講，卒之事故不斷，鑊鑊新鮮鑊鑊甘。

所以呢，家陣公共醫療系統當務之急，唔係開設新機構，增加高官職位，而係增加前線人手，提升醫護人員質素。政府開設基層醫療統籌處，實在係本末倒置。

醫管局家陣頭重腳輕，企都企唔穩，似足食咗問題奶粉嘅大頭娃娃，如果仲一味要將佢個頭谷大，佢遲早會仆喺度，永遠起唔到身。