尋日白鴿黨開完黨大會後，鐵頭仁公布派五隻白鴿，即係鄭家富、李永達、涂謹申、李華明同張文光五位議員去參觀世博，佔佢哋九個議席嘅一半有多，而佢就因為媽媽入咗醫院而決定唔去。佢仲話雖然佢都好唔滿意內地成日都限制佢嘅黨友返內地，但亦認為唔應該就咁放棄返內地體驗同考察世博香港館表現嘅機會喎。

同政府愈走愈埋

計計埋埋，連埋民協馮檢基、衞生服務界李國麟，以及依家仲十五十六緊嘅公文袋「異己」湯家驊，公社兩黨喺補選前應該流失咗七個半泛民議員幫手站台。

白鴿黨自從離棄公社兩黨、同其他組織自組終極普選聯盟後，同政府愈走愈埋，外間仲盛傳佢哋有機會支持政改方案添。今次呢個「和諧世博團」，佢哋仲出動大半隻白鴿去撐，睇嚟外間傳緊嘅風都未必無因，而呢個先係白鴿黨真正要擺嘅政治姿態—向阿爺示好！