民政事務局局長曾德成對本港申辦亞運依然十五十六，另邊廂廣州如火如荼咁準備年尾嘅亞運會。剛當選廣州市政協嘅二仔啟山前日拎住成疊文件出席廣州市政協會議，仲首次提案講及《借乘亞運東風傳揚廣東價值鑄煉廣州一線國際城市品牌》，滔滔不絕十五分鐘。

啟山建議廣州市政府向國際奧委會主席羅格等名人授予「廣州榮譽市民」名銜，又或將廣州亞運嘅開幕日定為運動日，有信心咁樣可以借亞運個勢，將廣州「升呢」為國際嘅一線城市。

內地傳媒對啟山嘅表現亦刮目相看，而啟山就回應話自己係番禺人，一向都好關心廣州嘅發展，仲話議政需要唔同年紀嘅人，佢一定會去足嚟緊五日半嘅會議喎。